Jubileum Jeugprins Niels I:  “kint ut nog gekker??? “

De reagenechtige zomer van 2011 is gelukkig alweer veurbiej, en op ut moment van sjrieve is ut alweer oktober. Nieks duit nog aan ut fees van vastelaovend dinke, mer toch sjtong d’r get heel belangrieks te gebeure. Ich zou bezeuk kriege van eine kandidaat Jubileum-Jeugprins.
Robin Kempen waas al get eerder biej mich thoes. Same höbbe ver gauw nog get dinkskes doorgesjpraoke, toet ut moment det om half ach ‘s aoves de deurbel ging. Ich sjprong van miene sjtool aaf om ins te gaon kieke. Ich deej de veurdeur aope, en dao sjting d’r dan; Niels Hoeymakers, waat mot waere Jeugprins Niels I, same mit mam Monique en pap Geert. De eerste vraog van Niels waas of ich toevallig nog get blauwe voetbalzúk in hoes haai. Achteraaf bleek det eine grote sjmoes om ut thoesfront te ontvluchte en waerde dao ins good om gelache!
Wie ver einmaol aan de taofel zoote kwaom ut mement det ver de grote vraog aan Niels koste sjtelle d’r al sjnel aan; “wils dich Jubileum Jeugprins waere?” Niels goof gelukkig ut antjwaord wao veer op gehaop haaije: “Jao, heel gaer!”

Jubileum Jeugprins Niels I
 Niels is gebaore op, presies dezelfde datum es zien tweelingzuster, 3 januari 1999 in Weert. Hae is de broor van Sten en Liz en eine zoon van Geert en Monique Hoeijmakers. Zo-és ger kint laeze kump d’r oet ein echte Leever vastelaoves femilie. Zowaal zien broor Sten als ziene pap Geert hubbe in ut verlede al ins mit de scepter mooge zjweije en zeen momenteel nog zeer actief tiedens de Leever Vastelaovend! Geert zit al meer és 20 jaor biej de Leever Prinsekapel en Sten is eine onmisbare krach biej de werkgroep van de Jeugdvastelaovend Leeve.
Waat kin ich wiejer vertelle euver Niels? Hae is 157 centimaeters groot, haet broen uig, waeg 45,11 kilogram sjoon aan de haok en ziene bloodgroep is O positief. Ut leefste duit Niels voetballe. Hae is eine echte sjpelverdeiler in de D1 van SC Leeuwen. Daonaeve sjpeelt Niels auch nog ins ein heel aardig partieke op zien cornet. Det duit d’r biej Oos Famfaar (Fanfare st. Laurentius) Verdere hobbies van ózze nuuje Heerser zeen: sjpele oppe playstation, mountainbiken en hél renne. Mit zien conditie zit ut dus waal good! Ut lievelingsaete van ózze Jubileumprins is natuurlijk echte vastelaoveskós: friet spesjaal mit eine frikkedel sjpesjaal. In ut dagelijks laeve zit Niels op ut Bisschoppelijk College Broekhin in Remunj. En waat ziene burgerlijke sjtaot betruf: Niels is ongehuwd en besjikbaar!

Adjudante
Natuurlijk kint eine Jeugprins neet zonger adjudante. Niels haet ze zellef oetgekaoze en ich zal ze aan öch versjtelle. De eerste dreug de naam Job Janssen, zeker geine onbekinde aangezeen dit de jong is waat de Jeug veurig jaor moch veurgaon! De tweede hit Sjoerd van Soest, eine echte vastelaovesgek dae veur ’t tweede jaor achterein adjudant moog waere! En de derde (Jao, alweer 3!) loestert nao de naam Thijs Deckers. Thijs haet de aafgeloupe jaore beweeze det auch hae wit wie d’r ’t rood-gael-greune fees mot viere! Ein geweldig trio dus!
Toet besjloet wil ich, auch names de hele vereiniging, öch ein geweldig jubileumsezoen toe-winse. Maak d’r get sjoons van! En gaer wil ich mien verhaolke besjloete mit de wies wäörd van ozze nuuje JubileumJeugprins 2012 Niels I: “Gek doon is sjoon!!!”

Maikel Sonnemans, veurzitter stg. Jeugdvastelaovend Leeve